奥密克戎要来独角戏
奥密克戎要来
（独角戏）
〔年4月12号，小浦东搭浦西爷叔个一次视频通话〕
小浦东：老爷叔，搿几天封得唻人哪能啦？
浦西爷叔：哪能？彻底疯脱，快变13点了！以前侪讲，要管住嘴迈开腿。现在反过来了，要管住腿张开嘴。闷关了嗨，练戆，隔天听叫号，下楼去，“全家捅”，测阴阳，整天介心慌意乱。
小浦东：搿正好对应了古典名著《三国演义》里向额一句名言，叫天下大势：“封久必核，核久必封”。
浦西爷叔：是额是额！我现在老懊恼额。当初一门心思要搬房子。
小浦东：搬房子有啥勿好？面积大眼，住勒适意。
浦西爷叔：我当时是考虑炒股票，讨口彩，所以要搬到长阳路来，希望天天拉阳线，赚钞票。现在回过头想想，住勒山阴路上其实蛮好，山阴山阴，讲起来侪是阴，多少香飘啊！
小浦东：世界上额事体，一时一时，讲勿清爽。搿一枪大家侪觉着阴盛阳衰好，怪只怪奥密克戎搿只妖怪，哪能料得到啦，搿只促掐鬼会窜到上海来弄松人。
浦西爷叔：搿倒是个，不过，我弄勿懂。上海大佬馆勿是讲好倷浦东3月28号封到4月1号，阿拉浦西从4月1号封到4月5号吗？现在索性以黄浦江为界额“鸳鸯火锅”也拆塌，改吃“全家封”了，还继续“蛤蜊炖蛋”，今朝阿拉已经封第12天了，疫情了犹未了，朝后去，真担心封控核检没完没了。
小浦东：搿事体勿好怪上海大佬馆额，我猜啊，伊拉也是征求了专家建议才拍个板，总勿见得叫浦东人愚人节出来做戆度，叫浦西人清明节出来当死货伐？所以呢，勿啰嗦，照封不误，搿能做，是为了大家太平，叫老百姓自己去理解。
浦西爷叔：搿倒也是个，如果夯不啷当一下子解封，出门碰到额勿是戆度就是死货，也吓煞人额！我有点勿理解额是，为啥3月底辰光浦西勿一道封塌呢？
小浦东：依我看，主要是上海大佬馆想做“小四眼”。
浦西爷叔：侬讲啥“小四眼”，伊拉侪是近视眼啊？
小浦东：勿是个，我讲额“小四眼”意思，就是想要上海经济损失少一眼、筛查力量集中一眼、老百姓生活影响小一眼、国际影响也尽量小一眼。
浦西爷叔：但是埃几天，交关人侪接错翎子勒，以为是上头有意识叫阿拉抓紧辰光抢购囤货，潇洒放松呐！
小浦东：埃几天，侬做了眼啥？
浦西爷叔：我嘛，退休人员“三等公民”（等吃、等睏、等死）一个，混勒人堆里，除了抢购，就是抓紧白相呀！
小浦东：老爷叔，侬哪能可以瞎来来呢，老危险额好伐。
浦西爷叔：侬真勿晓得，埃几天老清老早，菜市场里向侪是人，乱糟糟嗡了一桌堆，全凭力气拼抢，根本勿管菜价物价翻倍、社交距离远近了。
小浦东：要西勒，搿能样子勿是加快交叉感染吗？
浦西爷叔：侬哪能掐得介准啦，隔天菜市场就“出洋腔”封塌唻！
小浦东：我讲额伐，奥密克戎搿只妖怪比前一枪额德尔塔赤佬要凶险狡猾交交关。伊戴之一顶新帽子，飞来飞去、无影无踪，能隐匿、会潜伏，掐牢喉咙叫人痒煞、钻入鼻孔叫人齁煞，潜到肺里头叫人堵煞，翘辫子了叫人殟煞，而且搿只促掐鬼弄松人起来呒没一眼眼征兆个。
浦西爷叔：哎哟，比白骨精还妖嘛！但之前呒没人想到嘎许多，侪讲听天由命！我算算，还可以活络两天，中浪向，吃之饭，下半天我就偷偷叫迓进一间房子里去搓麻将。其实，我也勿是瘾头老粗个人，搓勿搓无所谓，主要是老搭子三缺一，勿去搓伐，有眼不作兴。
小浦东：老爷叔，侬是敢死队员啊，搿能做赛过陪无常鬼白相，作死啊！
浦西爷叔：啊呀，侬讲闲话口气搭我囡娪一式一样！伊关照我讲：“阿爸，侬脚头勿要太痒，外头病毒无孔不入，弄勿好一家门侪变羊！”我回答伊：“阿拉侪是打过三针额人好伐，难道预防针是骗骗野人头额吗？”
小浦东：老爷叔，侬也真是个。
浦西爷叔：后首来，想白相也勿来三了！埃天，刚刚摸了几张牌，被人告密，勒陌生头冲进来两个纠察，叫停了麻将，还逼牢阿拉四个人排好一字队、立壁角发誓，疫情期间决不再聚集搓麻将！
小浦东：伊拉做得对！搿是真心为倷好，老爷叔。
浦西爷叔：勿白相麻将作啥呢？夜快头，我为了安慰自家，咪了两口老酒后，就出去解恹气，汏了一次脚。
小浦东：奇怪了！疫情之下，倷伊面汏脚房还开门营业啊？
浦西爷叔：阿拉小区旁边有爿汏脚房，一个面孔夹?势白额中年女老板讲，上头呒没发调头，汏脚房照开勿误到31号。偏偏顾客多得来木姥姥，侪讲汏脚房阴气足，潇洒两个钟头也好。
小浦东：倷伊面也忒自由散漫了！弄勿好就搁落三姆密接感染、全军覆没闯穷祸，到头来勿死也得脱层皮！我弄勿懂，搿种事体倷街道里向大佬馆也死人勿管啊？！
浦西爷叔：根本呒没人过问，街道里大佬馆大概勒操心重点区域封控“捉羊”额大事体。阿拉搿的属于非重点区域，放两天羊无所谓额！好了，勿谈伊拉了，侬告我讲讲，倷伊面封控几天来情况哪能啦？
小浦东：啥，封几天？告侬讲。到今朝为止，已经十足一个号头，苦头吃煞！医生拿之一根棉签戏法戏法，像引逗“赚绩”一样，呒没一个人勿开牙额！
浦西爷叔：是蛮像额。
小浦东：喉咙一直有眼辣兮兮。我最最郁闷额是，呒没办法解释为啥要连牢仔做，真吃酸！尤其结果是阴性额，还要再核，非要测出几只“羊”来。
浦西爷叔：脚碰脚，阿拉小区本来全阴，封、核之后，每幢楼侪有“羊”唻。我猜大概搭长阳路名称有关。
小浦东：老爷叔，侬勿要乱花三千瞎联想！我想勿通，就去问居委会，伊拉睬侬翻白眼。打问询电话，侪讲是上级规定。偏勿巧，碰到我寻根牙痛发作（否则我也跟老婆一道去做志愿者了），真要命！痛得我心烦意乱，不得安宁。问居委会可以出去就医吗？居委会大佬馆讲：“勿准许！牙痛勿是病，属于非必要勿外出范围。”伊反问我：“侬是怀孕十月生小人伐？要勿，侬是绝症发作要死快了伐？侪勿是个，就乖乖叫蹲勒屋里向，啥地方也勿许去。”我牙齿痛得吃勿消，只好用牙膏敷、用清凉油塌，勿来三，再到冰箱里寻块冰出来含了嘴巴里，然后吃止痛药，屋里向止痛药全部吃光，再后首来只好硬屏、苦熬。
浦西爷叔：牙齿痛起来是蛮难熬额。
小浦东：我半边面孔肿得活像二师兄个骷髅头——猪头三一只，五海六肿。窝求苦恼跟伊拉商量，可以勿做核检伐？居委会大佬馆讲“勿来三！人人必须测阴阳。”真是病勿择时，哎哟，倒霉透顶！
浦西爷叔：哎呀！搿确实是够糟心个。
小浦东：倒霉事还有勒。阿拉小区说封就封，事先一眼也勿晓得，当中曾经放过半天，以为解封了，啥人料到仅仅是放个风透透气，溜了一趟狗，两个钟头后又宣布封控，我快要发疯变精神病了！
浦西爷叔：赛过关了疯人院！
小浦东：就是呀！我搭老婆两家头平常侪习惯网购，现吃现买，因此，屋里向吃额东西备货勿多，搿记戆塌！牙齿痛已经够难熬了，肚皮饿更加难熬，只好节食，每天由吃三餐改为两顿，也算对自然灾害年代饿肚皮有点切身感受了。白天居家办公做生活。夜里向牙齿痛睏勿着，索性坐勒床上刷手机抢购。一下子倒熟悉了交关额买菜软件，大开眼界。
浦西爷叔：哦，侬也帮我介绍一眼。
小浦东：听好了！有：盒马鲜生、京东到家、美团买菜、叮咚买菜、多多买菜、蜜蜂买菜、淘宝买菜、网鹊买菜、棋特买菜、圣鲜达买菜、土卜蔬、优鲜买菜、乐乐买菜、每日优鲜安心买菜、永辉买菜、佩齐买菜、享去买菜、日日买菜、天天买菜、楼下买菜、飞翼买菜、无忧买菜、小熊买菜、大妈买菜、蚂蚁买菜、嘟嘟买菜、小兔买菜……
浦西爷叔：哦呀，嘎许多啊！
小浦东：还有勒，大润发、联华超市、克买菜、买菜宝……
浦西爷叔：好了好了！侬勿要再推荐了，我老头子也盘勿大清爽，搿事体就让我囡娪去弄。侬讲吃苦头，后首来呢？
小浦东：平常我刷手机要订购啥就买啥，侪顺顺当当个。疫情之下，我刷了半半六十日，一样东西也呒没抢到，碰着大头鬼了！隔天，我手气老好，一上网就抢到机会，豪燥下单，买了千把块物事，荤个素个、水果狗粮侪有，OK！心里一笃定大放松，呼的呼的睏了一大觉。
浦西爷叔：衰瘏煞了！
小浦东：早朗向，我拔手机叮咚声惊醒，一看，昏过去，啥情况呢？对方讲由于运力原因，无法发送！“TMD！”我实在屏勿牢开起了国骂，要晓得我搿一枪屋里向个吃样逐日减少，眼看要“四大皆空”。
浦西爷叔：啥？“四大皆空”，侬搿辰光还想出家当和尚？
小浦东：老爷叔，我讲个是，阿拉屋里向“四大皆空”：厨房空空、冰箱空空、米袋空空、肚皮空空。
浦西爷叔：哈哈！亏侬想得出，倒是蛮形象个。那侬搭仔倷老婆哪能办呢？
小浦东：哪能办，喝水呀，撑撑肚皮！勿瞒侬讲，我老婆连牢仔吃了三天薄粥，我心疼得勿得了。我呐，开始辰光迓到角角里硬屏，后首来，饿得实在屏勿牢就偷偷叫吃了三顿狗粮。阿拉长毛小囡看到我吃伊额东西，伊奇怪煞塌，就一道抢了吃，扎劲唻。
浦西爷叔：好，小浦东大丈夫能屈能伸！我为侬点赞。
小浦东：肚皮饿得唻斜斜兮，3月底埃天，大概是天可怜见，我手机嘀一响收到一条
转载请注明：http://www.abuoumao.com/hykz/88.html
